masarrat ki ghaTaen hain wafur-e-shadmani hai

masarrat kī ghaTā.eñ haiñ vafūr-e-shādmānī hai

numāyāñ aaj gulshan meñ bahār-e-zindagānī hai

uḌā diiñ dhajjiyāñ dāman kī apne josh-e-bahjat meñ

chaman meñ aaj phūloñ ko bhī kitnī shādmānī hai

agar ulfat na hotī zindagānī talḳh ho jaatī

mohabbat hī haqīqat meñ bahār-e-jāvedānī hai

suneñge aap kab tak ye fasāna dard-e-ulfat kā

mire ayyām-e-rafta kī baḌī lambī kahānī hai

agar ho zauq-e-ulfat phuul ban jaate haiñ kāñTe bhī

mohabbat se jidhar dekho udhar hī shādmānī hai

huī jaatī hai jab tausī’ mī.ād-e-asīrī meñ

asīrān-e-qafas ko kyoñ phir itnī shādmānī hai

yahī din haiñ nashāt-angeziyāñ phir kyoñ na hoñ in meñ

murādeñ haiñ umangeñ haiñ ḳhudā rakkhe javānī hai

masā.ib meñ guloñ se koī sīkhe shādmāñ rahnā

garebāñ chaak hone par bhī kitnī shādmānī hai

na ghabrānā masā.ib meñ 'zakī' mauj-e-havādis se

are nādāñ mujāhid kī yahī to zindagānī hai

masarrat ki ghaTaen hain wafur-e-shadmani hai

numayan aaj gulshan mein bahaar-e-zindagani hai

uDa din dhajjiyan daman ki apne josh-e-bahjat mein

chaman mein aaj phulon ko bhi kitni shadmani hai

agar ulfat na hoti zindagani talKH ho jati

mohabbat hi haqiqat mein bahaar-e-jawedani hai

sunenge aap kab tak ye fasana dard-e-ulfat ka

mere ayyam-e-rafta ki baDi lambi kahani hai

agar ho zauq-e-ulfat phul ban jate hain kanTe bhi

mohabbat se jidhar dekho udhar hi shadmani hai

hui jati hai jab tausi’ miad-e-asiri mein

asiran-e-qafas ko kyon phir itni shadmani hai

yahi din hain nashat-angeziyan phir kyon na hon in mein

muraden hain umangen hain KHuda rakkhe jawani hai

masaib mein gulon se koi sikhe shadman rahna

gareban chaak hone par bhi kitni shadmani hai

na ghabrana masaib mein 'zaki' mauj-e-hawadis se

are nadan mujahid ki yahi to zindagani hai