masarraton ka khila hai har ek samt chaman

masarratoñ kā khilā hai har ek samt chaman

magar ye dil ki hai phir bhī qatīl-e-ranj-o-mehan

baḌe sukūn se zulfeñ sañvārne vaale

kisī kī ziist na ban jaa.e mustaqil uljhan

mire junūñ pe rahe log mo'tariz lekin

na dekhe aah kisī ne tire ḳhutūt-e-badan

abhī to harf-e-tamannā kā zikr tak bhī nahīñ

abhī na Daal ḳhudā ke liye jabīñ pe shikan

dil-e-fasurda meñ yuuñ terī yaad aa.ī hai

shab-e-siyāh meñ jis tarah raushnī kī kiran

ye kis ne jhuum ke mastī meñ lī hai añgḌā.ī

fusūñ-tarāz hai ye kis kā rañg-e-pairāhan

guzar gayā hai zamāna magar mujhe 'rif.at'

hai ab bhī yaad kisī kī nigāh-e-tauba-shikan

masarraton ka khila hai har ek samt chaman

magar ye dil ki hai phir bhi qatil-e-ranj-o-mehan

baDe sukun se zulfen sanwarne wale

kisi ki zist na ban jae mustaqil uljhan

mere junun pe rahe log mo'tariz lekin

na dekhe aah kisi ne tere KHutut-e-badan

abhi to harf-e-tamanna ka zikr tak bhi nahin

abhi na Dal KHuda ke liye jabin pe shikan

dil-e-fasurda mein yun teri yaad aai hai

shab-e-siyah mein jis tarah raushni ki kiran

ye kis ne jhum ke masti mein li hai angDai

fusun-taraaz hai ye kis ka rang-e-pairahan

guzar gaya hai zamana magar mujhe 'rifat'

hai ab bhi yaad kisi ki nigah-e-tauba-shikan