مشعل درد کو بھڑکاؤ کہ کچھ رات کٹے

مشعل درد کو بھڑکاؤ کہ کچھ رات کٹے

آج ہر زخم کو چمکاؤ کہ کچھ رات کٹے

پھر چلے ان کی حدیث لب و رخسار چلو

دار پر ہم کو چڑھا آؤ کہ کچھ رات کٹے

وہ تو سب بھر گئے اب تک جو ملے تھے یارو

اب کوئی زخم نیا کھاؤ کہ کچھ رات کٹے

تلخی زیست کے سناٹے سے ڈر لگتا ہے

پھر غم یار کو بلواؤ کہ کچھ رات کٹے

اک نہ اک حادثہ ہر سانس کے ساتھ آتا ہے

میری جاں تم بھی چلی آؤ کہ کچھ رات کٹے

سرد و خاموش ہے اب انجمن فن شاغلؔ

شعر و احساس کو سلگاؤ کہ کچھ رات کٹے