mashal-e-dard ko bhaDkao ki kuchh raat kaTe

mash.al-e-dard ko bhaḌkāo ki kuchh raat kaTe

aaj har zaḳhm ko chamkāo ki kuchh raat kaTe

phir chale un kī hadīs-e-lab-o-ruḳhsār chalo

daar par ham ko chaḌhā aao ki kuchh raat kaTe

vo to sab bhar ga.e ab tak jo mile the yaaro

ab koī zaḳhm nayā khaao ki kuchh raat kaTe

talḳhī-e-zīst ke sannāTe se Dar lagtā hai

phir ġham-e-yār ko bulvāo ki kuchh raat kaTe

ik na ik hādisa har saañs ke saath aatā hai

merī jaañ tum bhī chalī aao ki kuchh raat kaTe

sard-o-ḳhāmosh hai ab anjuman-e-fan 'shāġhil'

sher-o-ehsās ko sulgāo ki kuchh raat kaTe

mashal-e-dard ko bhaDkao ki kuchh raat kaTe

aaj har zaKHm ko chamkao ki kuchh raat kaTe

phir chale un ki hadis-e-lab-o-ruKHsar chalo

dar par hum ko chaDha aao ki kuchh raat kaTe

wo to sab bhar gae ab tak jo mile the yaro

ab koi zaKHm naya khao ki kuchh raat kaTe

talKHi-e-zist ke sannaTe se Dar lagta hai

phir gham-e-yar ko bulwao ki kuchh raat kaTe

ek na ek hadisa har sans ke sath aata hai

meri jaan tum bhi chali aao ki kuchh raat kaTe

sard-o-KHamosh hai ab anjuman-e-fan 'shaghil'

sher-o-ehsas ko sulgao ki kuchh raat kaTe