mashaqqat ki tapish mein jism ka loha galate hain

mashaqqat kī tapish meñ jism kā lohā galāte haiñ

baḌī mushkil se is miTTī ko ham sonā banāte haiñ

taraste haiñ kahīñ kuchh log roTī ke nivāloñ ko

kahīñ har shaam shahzāde sharāboñ meñ nahāte haiñ

kabhī sūkhe hue peḌoñ kā vo mātam nahīñ karte

hoñ jin ke zehn ta.amīrī na.e paude lagāte haiñ

ḳhudāyā rahm in ma.asūm bachchoñ ke laḌakpan par

jinheñ kāġhaz siyah karne the vo kāġhaz uThāte haiñ

bahut aañsū rulā.e haiñ hameñ taqsīm-e-gulshan ne

muhājir vo samajhte haiñ to ye bāġhī batāte haiñ

maiñ apne zarf se baḌh kar agar kuchh maañg letā huuñ

to phir ehsās ke sho.ale sukūñ merā jalāte haiñ

musībat koī aa jaa.e kisī par is zamāne meñ

to phir kyā ġhair kyā apne sabhī dāman bachāte haiñ

mashaqqat ki tapish mein jism ka loha galate hain

baDi mushkil se is miTTi ko hum sona banate hain

taraste hain kahin kuchh log roTi ke niwalon ko

kahin har sham shahzade sharabon mein nahate hain

kabhi sukhe hue peDon ka wo matam nahin karte

hon jin ke zehn tamiri nae paude lagate hain

KHudaya rahm in masum bachchon ke laDakpan par

jinhen kaghaz siyah karne the wo kaghaz uThate hain

bahut aansu rulae hain hamein taqsim-e-gulshan ne

muhajir wo samajhte hain to ye baghi batate hain

main apne zarf se baDh kar agar kuchh mang leta hun

to phir ehsas ke shoale sukun mera jalate hain

musibat koi aa jae kisi par is zamane mein

to phir kya ghair kya apne sabhi daman bachate hain