مشقتوں کا حوالہ نہیں اترتا ہے

مشقتوں کا حوالہ نہیں اترتا ہے

ہمارے ہاتھ سے چھالا نہیں اترتا ہے

اتارے جاتے ہیں آنکھوں میں ایسے ایسے عذاب

گلے سے ایک نوالہ نہیں اترتا ہے

وہ ماہتاب ہے جس دن سے قید کمرے میں

ہماری چھت پہ اجالا نہیں اترتا ہے

ہمارے حال پہ نا بینا لوگ رونے لگے

بس اس کی آنکھ کا جالا نہیں اترتا ہے

میں جب سے بھائیوں کے پیچھے پیچھے چلنے لگا

کسی کی پیٹھ پہ بھالا نہیں اترتا ہے

زمیں پہ روز اترتی ہیں آفتیں دانشؔ

مگر اتارنے والا نہیں اترتا ہے