mashiyyat kis ke bas mein faza se kaun laDta hai

mashiyyat kis ke bas meñ fazā se kaun laḌtā hai

yahāñ jo sar uThātā hai use jhuknā hī paḌtā hai

chalā huuñ dair se sū-e-haram lekin ye aalam hai

ki jaise koī rah rah kar mirā dāman pakaḌtā hai

haqīqat se baġhāvat uljhanoñ meñ Daal detī hai

ye saudā laakh sastā ho magar mahñgā hī paḌtā hai

janāb-e-shaiḳh ne parda uThāyā is haqīqat se

ki ik aalim bigaḌtā hai to ik aalam bigaḌtā hai

nasheman luT chukā radd-e-amal kā intizār ab hai

bhalā ghar dekhiye sayyād kā kab tak ujaḌtā hai

yaqīñ kī aag meñ taptī hai jab rūh-e-ḳhudī barsoñ

kahīñ tab jā ke sho.ala phuul kī sūrat pakaḌtā hai

kahīñ Thokar na khā jaanā ki muñh par aañkh rakhte ho

haram kī raah meñ 'fārūq' but-ḳhāna bhī paḌtā hai

mashiyyat kis ke bas mein faza se kaun laDta hai

yahan jo sar uThata hai use jhukna hi paDta hai

chala hun dair se su-e-haram lekin ye aalam hai

ki jaise koi rah rah kar mera daman pakaDta hai

haqiqat se baghawat uljhanon mein Dal deti hai

ye sauda lakh sasta ho magar mahnga hi paDta hai

janab-e-shaiKH ne parda uThaya is haqiqat se

ki ek aalim bigaDta hai to ek aalam bigaDta hai

nasheman luT chuka radd-e-amal ka intizar ab hai

bhala ghar dekhiye sayyaad ka kab tak ujaDta hai

yaqin ki aag mein tapti hai jab ruh-e-KHudi barson

kahin tab ja ke shoala phul ki surat pakaDta hai

kahin Thokar na kha jaana ki munh par aankh rakhte ho

haram ki rah mein 'faruq' but-KHana bhi paDta hai