mashware par na kahin dhup ke chalne lag jaen

mashvare par na kahīñ dhuup ke chalne lag jaa.eñ

aadmī mom baneñ aur pighalne lag jaa.eñ

jaise māhaul badal detī hai muskān tirī

pairahan dekh ke mausam na badalne lag jaa.eñ

is qadar buġhz diloñ meñ hai ki ma.alūm nahīñ

log kab kis ke liye zahr ugalne lag jaa.eñ

dekh kar raunaq-e-bāzār meñ bachchoñ kā sabr

ab ye ḳhatra hai khilaune na machalne lag jaa.eñ

ham bhī gulshan se nikal jā.eñge ḳhāmoshī se

na.e paude to zarā phūlne phalne lag jaa.eñ

maut hai bhuuk hai kartab hai ki kyā hai jab log

do sutūnoñ se bañdhī taar pe chalne lag jaa.eñ

tum batānā ki 'hasan' ḳhvāb nahīñ sach hai ye

ham tumheñ dekh ke jab aañkh masalne lag jaa.eñ

mashware par na kahin dhup ke chalne lag jaen

aadmi mom banen aur pighalne lag jaen

jaise mahaul badal deti hai muskan teri

pairahan dekh ke mausam na badalne lag jaen

is qadar bughz dilon mein hai ki malum nahin

log kab kis ke liye zahr ugalne lag jaen

dekh kar raunaq-e-bazar mein bachchon ka sabr

ab ye KHatra hai khilaune na machalne lag jaen

hum bhi gulshan se nikal jaenge KHamoshi se

nae paude to zara phulne phalne lag jaen

maut hai bhuk hai kartab hai ki kya hai jab log

do sutunon se bandhi tar pe chalne lag jaen

tum batana ki 'hasan' KHwab nahin sach hai ye

hum tumhein dekh ke jab aankh masalne lag jaen