مثیل سیل رواں دشت و جو میں گزری ہے

مثیل سیل رواں دشت و جو میں گزری ہے

حیات ہجر کے طوق گلو میں گزری ہے

وہی تو میری متاع حیات ہے جاناں

جو ایک سانس تری جستجو میں گزری ہے

گلوں کو دشت کی ویرانگی نہیں معلوم

کہ ان کی زیست فقط رنگ و بو میں گزری ہے

کیا تھا دامن دل چاک بے رخی نے تری

حیات ساری ہی کار رفو میں گزری ہے

تمام عمر کی حسرت کا دے گئی تحفہ

وہ اک گھڑی جو تری آرزو میں گزری ہے

وہ ایک بات جو کہنی تھی کہہ نہیں پائے

اگرچہ وصل کی شب گفتگو میں گزری ہے

رہی ہے گریہ کناں چشم نا رسا دائم

حیات چہرے کی ساری وضو میں گزری ہے