masjid ka hai KHayal KHarabaat ka KHayal

masjid kā hai ḳhayāl ḳharābāt kā ḳhayāl

vo rind huuñ ki hai mujhe auqāt kā ḳhayāl

barsāt meñ hai tauba-o-tā.āt kā ḳhayāl

tauba ke saath saath hai barsāt kā ḳhayāl

shab ko vahī hai ḳhvāb-e-pareshāñ jo din meñ thā

din ho gayā to mujh ko vahī raat kā ḳhayāl

ālī-dimāġh huuñ tirī zulfeñ haiñ haath meñ

sau haath kā kaleja hai so haat kā ḳhayāl

zāhid raheñ janāb ḳhayāl-e-iram se ḳhush

ārām meñ hai qibla-e-hājāt kā ḳhayāl

ai shoḳh chāhtā hai safā.ī ye ḳhatt-e-sabz

muusā ko hai ḳhizar kī mulāqāt kā ḳhayāl

bose diye haiñ aap ne to le ke naqd-e-dil

sadqe kā dhyān thā mujhe ḳhairāt kā ḳhayāl

umr-e-guzishta chāhiye taa.at ke vāste

ham kyoñ kareñ talāfī-e-māfāt kā ḳhayāl

tum ḳhuub jānte ho samajhte ho kyā kahūñ

jis raat kā ḳhayāl hai jis baat kā ḳhayāl

jām-o-kabāb-o-mai gul-o-gul-rū-o-māh-o-bāġh

barsāt meñ zarūr hai in saat kā ḳhayāl

palle meñ bāñdh le dil-e-'rāsiḳh' payāmbar

un ke liye hai gar tujhe sauġhāt kā ḳhayāl

masjid ka hai KHayal KHarabaat ka KHayal

wo rind hun ki hai mujhe auqat ka KHayal

barsat mein hai tauba-o-taat ka KHayal

tauba ke sath sath hai barsat ka KHayal

shab ko wahi hai KHwab-e-pareshan jo din mein tha

din ho gaya to mujh ko wahi raat ka KHayal

aali-dimagh hun teri zulfen hain hath mein

sau hath ka kaleja hai so hat ka KHayal

zahid rahen janab KHayal-e-iram se KHush

aaram mein hai qibla-e-hajat ka KHayal

ai shoKH chahta hai safai ye KHatt-e-sabz

musa ko hai KHizar ki mulaqat ka KHayal

bose diye hain aap ne to le ke naqd-e-dil

sadqe ka dhyan tha mujhe KHairaat ka KHayal

umr-e-guzishta chahiye taat ke waste

hum kyon karen talafi-e-mafat ka KHayal

tum KHub jaante ho samajhte ho kya kahun

jis raat ka KHayal hai jis baat ka KHayal

jam-o-kabab-o-mai gul-o-gul-ru-o-mah-o-bagh

barsat mein zarur hai in sat ka KHayal

palle mein bandh le dil-e-'rasiKH' payambar

un ke liye hai gar tujhe saughat ka KHayal