مسجد میں بھی جاتا ہوں تو مے خانہ سمجھ کر

مسجد میں بھی جاتا ہوں تو مے خانہ سمجھ کر

ہر ظرف وضو لیتا ہوں پیمانہ سمجھ کر

لے بوسۂ زلف اے دل فرزانہ سمجھ کر

الجھیں نہ کہیں تجھ سے وہ دیوانہ سمجھ کر

لو شمع رخوں سے نہ لگا اے دل ناداں

عاشق کو بلاتے ہیں وہ پروانہ سمجھ کر

گردش مری قسمت کی تجھے چین نہ دے گی

اے چرخ مجھے پیس نہ تو دانہ سمجھ کر

اللہ رے تجاہل مجھے دیکھا جو سر بزم

منہ پھیر لیا یار نے بیگانہ سمجھ کر

آنے کو تو آئے وہ مرے خانۂ دل میں

دم بھر بھی نہ ٹھہرے یہاں ویرانہ سمجھ کر

کس درجہ تعلق ہے مرے دل کو بتوں سے

کعبہ میں بھی جاتا ہوں تو بت خانہ سمجھ کر

دلچسپ کچھ ایسا ہے کہ دشمن کی زباں سے

سنتے ہیں مرا ذکر وہ افسانہ سمجھ کر

دیتے تو ہو دل اس بت بے مہر و وفا کو

لیکن ذرا اے صابرؔ فرزانہ سمجھ کر