masjid mein bhi jata hun to mai-KHana samajh kar

masjid meñ bhī jaatā huuñ to mai-ḳhāna samajh kar

har zarf-e-vazū letā huuñ paimāna samajh kar

le bosa-e-zulf ai dil-e-farzāna samajh kar

uljheñ na kahīñ tujh se vo dīvāna samajh kar

lau sham.a-ruḳhoñ se na lagā ai dil-e-nādāñ

āshiq ko bulāte haiñ vo parvāna samajh kar

gardish mirī qismat kī tujhe chain na degī

ai charḳh mujhe piis na tū daana samajh kar

allah re tajāhul mujhe dekhā jo sar-e-bazm

muñh pher liyā yaar ne begāna samajh kar

aane ko to aa.e vo mire ḳhāna-e-dil meñ

dam bhar bhī na Thahre yahāñ vīrāna samajh kar

kis darja ta'alluq hai mire dil ko butoñ se

ka.aba meñ bhī jaatā huuñ to but-ḳhāna samajh kar

dilchasp kuchh aisā hai ki dushman kī zabāñ se

sunte haiñ mirā zikr vo afsāna samajh kar

dete to ho dil us but-e-be-mehr-o-vafā ko

lekin zarā ai 'sābir'-e-farzāna samajh kar

masjid mein bhi jata hun to mai-KHana samajh kar

har zarf-e-wazu leta hun paimana samajh kar

le bosa-e-zulf ai dil-e-farzana samajh kar

uljhen na kahin tujh se wo diwana samajh kar

lau shama-ruKHon se na laga ai dil-e-nadan

aashiq ko bulate hain wo parwana samajh kar

gardish meri qismat ki tujhe chain na degi

ai charKH mujhe pis na tu dana samajh kar

allah re tajahul mujhe dekha jo sar-e-bazm

munh pher liya yar ne begana samajh kar

aane ko to aae wo mere KHana-e-dil mein

dam bhar bhi na Thahre yahan virana samajh kar

kis darja ta'alluq hai mere dil ko buton se

kaba mein bhi jata hun to but-KHana samajh kar

dilchasp kuchh aisa hai ki dushman ki zaban se

sunte hain mera zikr wo afsana samajh kar

dete to ho dil us but-e-be-mehr-o-wafa ko

lekin zara ai 'sabir'-e-farzana samajh kar