masKH alfaz ko jaise ho maani darkar

masḳh alfāz ko jaise ho ma'ānī darkār

merī rūdād ko hai ek kahānī darkār

mujh meñ maiñ huuñ yā koī aur hai shāmil mujh meñ

ab mirī zaat ko hai koī nishānī darkār

koī parchhā.ī haTā.e ki girānī hai bahut

jism-e-ḳhasta ko hai ab naql-e-makānī darkār

kyā 'ajab hai ki samundar hai jahāñ āb-e-hayāt

tishna-lab ko hai usī paanī meñ paanī darkār

kuchh ziyāda hī qarīñ hai vo chhurī shah-rag se

aur rag rag meñ lahū ko hai ravānī darkār

is se pahle ki koī ḳhvāb dhuāñ ho jaa.e

chashm-e-tar ko hai mire ashk-fishānī darkār

masKH alfaz ko jaise ho ma'ani darkar

meri rudad ko hai ek kahani darkar

mujh mein main hun ya koi aur hai shamil mujh mein

ab meri zat ko hai koi nishani darkar

koi parchhai haTae ki girani hai bahut

jism-e-KHasta ko hai ab naql-e-makani darkar

kya 'ajab hai ki samundar hai jahan aab-e-hayat

tishna-lab ko hai usi pani mein pani darkar

kuchh ziyaada hi qarin hai wo chhuri shah-rag se

aur rag rag mein lahu ko hai rawani darkar

is se pahle ki koi KHwab dhuan ho jae

chashm-e-tar ko hai mere ashk-fishani darkar