مصلحت کا چار سو تیزاب ہے

مصلحت کا چار سو تیزاب ہے

کون کس کے واسطے بیتاب ہے

آپ الفت سے کوئی سیراب ہے

اور کوئی ماہیٔ بے آب ہے

چشم قاتل آج جو پر آب ہے

وہ میری تہذیب کا اک باب ہے

طاق نسیاں پر دھری ہیں خواہشیں

دل کلام پاک کی محراب ہے

موج غم پہنچیں گی ان تک بالیقیں

غم کے دریا میں اگر سیلاب ہے

ہجر میں بھی ہے وفا کی روشنی

آبروئے غم ہے رخ پر آب ہے

چاندنی سے اس کی روشن روز و شب

آسمان دل کا جو مہتاب ہے

تشنگی کے خون نے سینچا اسے

گلشن دیں دائمی شاداب ہے

ذات کا جھگڑا جہاں سے مٹ گیا

جاگتی آنکھوں کا مخفیؔ خواب ہے