maslahat ke liye ab sar na jhukaya jae

maslahat ke liye ab sar na jhukāyā jaa.e

dil na milte hoñ to kyoñ haath milāyā jaa.e

kaif-āvar hai bahut un se bichhaḌ kar milnā

aur ik baar bichhaḌ kar unheñ paayā jaa.e

ham añdheroñ hī meñ sahrā kā safar kar leñge

raushnī ke liye ḳhema na jalāyā jaa.e

shajar-e-zabt se Tapke na samar aañsū kā

ehtirāman use palkoñ pe sajāyā jaa.e

chāñdnī chāñd mahak phuul shafaq rañg-e-gulāb

aur kis naam se ab un ko bulāyā jaa.e

jaane us paar ke hālāt hoñ kaise ab ke

kashtiyoñ ko sar-e-sāhil na jalāyā jaa.e

so rahā ho koī to us ko jagā.eñ 'fārūq'

jāgtā ho jo use kaise jagāyā jaa.e

maslahat ke liye ab sar na jhukaya jae

dil na milte hon to kyon hath milaya jae

kaif-awar hai bahut un se bichhaD kar milna

aur ek bar bichhaD kar unhen paya jae

hum andheron hi mein sahra ka safar kar lenge

raushni ke liye KHema na jalaya jae

shajar-e-zabt se Tapke na samar aansu ka

ehtiraman use palkon pe sajaya jae

chandni chand mahak phul shafaq rang-e-gulab

aur kis nam se ab un ko bulaya jae

jaane us par ke haalat hon kaise ab ke

kashtiyon ko sar-e-sahil na jalaya jae

so raha ho koi to us ko jagaen 'faruq'

jagta ho jo use kaise jagaya jae