masruf hain tawaf mein mai-KHwar aaj-kal

masrūf haiñ tavāf meñ mai-ḳhvār āj-kal

ka.aba banā hai ḳhāna-e-ḳhammār āj-kal

kūcha hai un kā misr kā bāzār āj-kal

chāroñ taraf khaḌe haiñ ḳharīdār āj-kal

tār-e-nazar bhī TukḌe ho dekhe agar koī

aisī uThī hai yaar kī talvār āj-kal

jaatī hai aise ġhairat-e-yūsuf par apnī jaan

saarā jahāñ hai jis kā ḳharīdār āj-kal

har har qadam pe hote haiñ ushshāq pā.emāl

sīkhī hai tum ne kis se ye raftār āj-kal

bijlī bhī gir paḌī to maiñ dekhūñ jamāl-e-yār

allāh re ye hasrat-e-dīdār āj-kal

terī kamar se dete haiñ tashbīh ḳhās-o-ām

lāġhar huā hai aisā tan-e-zār āj-kal

haddād vahshiyoñ ko hai saudā-e-zulf-e-yār

zanjīr-o-tauq donoñ haiñ darkār āj-kal

sayyād-o-bāġhbān tire dushman haiñ andalīb

rahnā na tū chaman meñ ḳhabar-dār āj-kal

maiñ lan-tarāniyoñ ko na mānūñgā aap kī

mūsā-sifat huuñ tālib-e-dīdār āj-kal

dete haiñ vo sazā mujhe ġhairoñ ke jurm par

koī nahīñ hai mujh sā gunahgār āj-kal

phir iḳhtilāj-e-qalb huā phir huā junūn

phir ho gayā hai ishq kā āzār āj-kal

bulbul hai shāḳh-e-gul pe na qumrī hai sarv par

barbād sab ḳhizāñ se hai gulzār āj-kal

tā.ūs-o-kabk donoñ haiñ vārafta haal par

chaltā hai naaz kī jo vo raftār āj-kal

dil kis sanam pe aaya hai batlāo to 'vafā'

pur-dard tum jo kahte ho ash.ār āj-kal

masruf hain tawaf mein mai-KHwar aaj-kal

kaba bana hai KHana-e-KHammar aaj-kal

kucha hai un ka misr ka bazar aaj-kal

chaaron taraf khaDe hain KHaridar aaj-kal

tar-e-nazar bhi TukDe ho dekhe agar koi

aisi uThi hai yar ki talwar aaj-kal

jati hai aise ghairat-e-yusuf par apni jaan

sara jahan hai jis ka KHaridar aaj-kal

har har qadam pe hote hain ushshaq paemal

sikhi hai tum ne kis se ye raftar aaj-kal

bijli bhi gir paDi to main dekhun jamal-e-yar

allah re ye hasrat-e-didar aaj-kal

teri kamar se dete hain tashbih KHas-o-am

laghar hua hai aisa tan-e-zar aaj-kal

haddad wahshiyon ko hai sauda-e-zulf-e-yar

zanjir-o-tauq donon hain darkar aaj-kal

sayyaad-o-baghban tere dushman hain andalib

rahna na tu chaman mein KHabar-dar aaj-kal

main lan-taraniyon ko na manunga aap ki

musa-sifat hun talib-e-didar aaj-kal

dete hain wo saza mujhe ghairon ke jurm par

koi nahin hai mujh sa gunahgar aaj-kal

phir iKHtilaj-e-qalb hua phir hua junun

phir ho gaya hai ishq ka aazar aaj-kal

bulbul hai shaKH-e-gul pe na qumri hai sarw par

barbaad sab KHizan se hai gulzar aaj-kal

taus-o-kabk donon hain warafta haal par

chalta hai naz ki jo wo raftar aaj-kal

dil kis sanam pe aaya hai batlao to 'wafa'

pur-dard tum jo kahte ho ashaar aaj-kal