مصروف ہیں طواف میں مے خوار آج کل

مصروف ہیں طواف میں مے خوار آج کل

کعبہ بنا ہے خانۂ خمار آج کل

کوچہ ہے ان کا مصر کا بازار آج کل

چاروں طرف کھڑے ہیں خریدار آج کل

تار نظر بھی ٹکڑے ہو دیکھے اگر کوئی

ایسی اٹھی ہے یار کی تلوار آج کل

جاتی ہے ایسے غیرت یوسف پر اپنی جان

سارا جہاں ہے جس کا خریدار آج کل

ہر ہر قدم پہ ہوتے ہیں عشاق پائمال

سیکھی ہے تم نے کس سے یہ رفتار آج کل

بجلی بھی گر پڑی تو میں دیکھوں جمال یار

اللہ رے یہ حسرت دیدار آج کل

تیری کمر سے دیتے ہیں تشبیہ خاص و عام

لاغر ہوا ہے ایسا تن زار آج کل

حداد وحشیوں کو ہے سودائے زلف یار

زنجیر و طوق دونوں ہیں درکار آج کل

صیاد و باغبان ترے دشمن ہیں عندلیب

رہنا نہ تو چمن میں خبردار آج کل

میں لن ترانیوں کو نہ مانوں گا آپ کی

موسیٰ صفت ہوں طالب دیدار آج کل

دیتے ہیں وہ سزا مجھے غیروں کے جرم پر

کوئی نہیں ہے مجھ سا گنہ گار آج کل

پھر اختلاج قلب ہوا پھر ہوا جنون

پھر ہو گیا ہے عشق کا آزار آج کل

بلبل ہے شاخ گل پہ نہ قمری ہے سرو پر

برباد سب خزاں سے ہے گلزار آج کل

طاؤس و کبک دونوں ہیں وارفتہ حال پر

چلتا ہے ناز کی جو وہ رفتار آج کل

دل کس صنم پہ آیا ہے بتلاؤ تو وفاؔ

پر درد تم جو کہتے ہو اشعار آج کل