masruf rahguzar pe chala ja raha tha main

masrūf rahguzar pe chalā jā rahā thā maiñ

phir kyuuñ lagā ki sab se judā jā rahā thā maiñ

ta.amīr-e-zāt hī meñ lagī zindagī tamām

ḳhāliq banā rahā thā banā jā rahā thā maiñ

hāsil thiiñ jin ko rāhateñ vo bhī fanā hue

kyuuñ apnī muflisī se Darā jā rahā thā maiñ

dariyā-e-zīst kī yahī manzil thī āḳhirī

ik bahr-e-be-karāñ meñ girā jā rahā thā maiñ

samjhā thā aa.ine meñ mirā aks hī nahīñ

zāhir thā aur sab se chhupā jā rahā thā maiñ

pahle to kū-e-yār kī phir daar kī talab

daldal meñ ḳhvāhishoñ kī dhañsā jā rahā thā maiñ

maiñ gard-e-rāh thā magar e.ajāz dekhiye

har kārvāñ ke saath uḌā jā rahā thā maiñ

rukne meñ Dar ye thā ki tavāzun bigaḌ na jaa.e

'ādil' isī gumāñ meñ chalā jā rahā thā maiñ

masruf rahguzar pe chala ja raha tha main

phir kyun laga ki sab se juda ja raha tha main

tamir-e-zat hi mein lagi zindagi tamam

KHaliq bana raha tha bana ja raha tha main

hasil thin jin ko rahaten wo bhi fana hue

kyun apni muflisi se Dara ja raha tha main

dariya-e-zist ki yahi manzil thi aaKHiri

ek bahr-e-be-karan mein gira ja raha tha main

samjha tha aaine mein mera aks hi nahin

zahir tha aur sab se chhupa ja raha tha main

pahle to ku-e-yar ki phir dar ki talab

daldal mein KHwahishon ki dhansa ja raha tha main

main gard-e-rah tha magar eajaz dekhiye

har karwan ke sath uDa ja raha tha main

rukne mein Dar ye tha ki tawazun bigaD na jae

'adil' isi guman mein chala ja raha tha main