مست شراب ناز پر شکوے کا کچھ اثر نہیں

مست شراب ناز پر شکوے کا کچھ اثر نہیں

میری خبر ہو کیا انہیں اپنی جنہیں خبر نہیں

گردش روزگار سے خوف مجھے ہوا ہی کب

سیل الم سے بہہ سکے پہلو میں وہ جگر نہیں

گود میں حادثات کے پل کے ہی میں جواں ہوا

وہ نہیں زندگی قبول جس میں کوئی خطر نہیں

منزل عشق میں مجھے آئے تو سخت مرحلے

بڑھنا نہیں ہے سہل اگر رکنا بھی سہل تر نہیں

میں ہوں یہاں بھی بیقرار تھا میں وہاں بھی بیقرار

دل کی دوا ادھر نہ تھی دل کی دوا ادھر نہیں

گھر کے گھٹا اٹھی ابھی چھٹ بھی گئی ابھی حبیبؔ

میری شب فراق کی دہر میں کیا سحر نہیں