mast nazron ka iltifat na puchh

mast nazroñ kā iltifāt na pūchh

jhuum uThī dil kī kā.enāt na pūchh

apnī nazroñ kī kaifiyāt na pūchh

muskurā dī mirī hayāt na pūchh

ishq meñ har qadam hai ik manzil

rāh-e-ulfat kī mushkilāt na pūchh

maiñ huuñ aur aap kā tasavvur hai

ab mirī raunaq-e-hayāt na pūchh

jaise har lahza dekhte ho mujhe

mirī mashq-e-tasavvurāt na pūchh

harf-e-matlab zabāñ pe lā na sakā

dil meñ ab tak hai dil kī baat na pūchh

hijr kā haal kyā batā.eñ 'vaqār'

kaise din guzrā kaise raat na pūchh

mast nazron ka iltifat na puchh

jhum uThi dil ki kaenat na puchh

apni nazron ki kaifiyat na puchh

muskura di meri hayat na puchh

ishq mein har qadam hai ek manzil

rah-e-ulfat ki mushkilat na puchh

main hun aur aap ka tasawwur hai

ab meri raunaq-e-hayat na puchh

jaise har lahza dekhte ho mujhe

meri mashq-e-tasawwuraat na puchh

harf-e-matlab zaban pe la na saka

dil mein ab tak hai dil ki baat na puchh

hijr ka haal kya bataen 'waqar'

kaise din guzra kaise raat na puchh