masti-e-gam bhi thi ghaflat-e-anjam ke sath

masti-e-gām bhī thī ġhaflat-e-anjām ke saath

do ghaḌī khel liye gardish-e-ayyām ke saath

tishna-lab rahne pe bhī saakh to thī shaan to thī

vaz-e-rindāna ga.ī ik talab-e-jām ke saath

jab se hañgām-e-safar ashkoñ ke taare chamke

talḳhiyāñ ho ga.iiñ vābasta har ik shaam ke saath

ab na vo shorish-e-raftār na vo josh-e-junūñ

ham kahāñ phañs ga.e yārān-e-subuk-gām ke saath

uḌ chukī haiñ sitam-ārāoñ kī nīndeñ aksar

aap suniye kabhī afsāna ye ārām ke saath

is meñ saaqī kā bhī dar-parda ishāra to nahīñ

aaj kuchh rind bhī the vā.iz-e-badnām ke saath

ġhair kī tarah mile ahl-e-haram ai 'zaidī'

mujh ko yak-go na aqīdat jo thī asnām ke saath

masti-e-gam bhi thi ghaflat-e-anjam ke sath

do ghaDi khel liye gardish-e-ayyam ke sath

tishna-lab rahne pe bhi sakh to thi shan to thi

waz-e-rindana gai ek talab-e-jam ke sath

jab se hangam-e-safar ashkon ke tare chamke

talKHiyan ho gain wabasta har ek sham ke sath

ab na wo shorish-e-raftar na wo josh-e-junun

hum kahan phans gae yaran-e-subuk-gam ke sath

uD chuki hain sitam-araon ki ninden aksar

aap suniye kabhi afsana ye aaram ke sath

is mein saqi ka bhi dar-parda ishaara to nahin

aaj kuchh rind bhi the waiz-e-badnam ke sath

ghair ki tarah mile ahl-e-haram ai 'zaidi'

mujh ko yak-go na aqidat jo thi asnam ke sath