مستی میں بھی خیال حدود ادب رہا

مستی میں بھی خیال حدود ادب رہا

اشکوں میں حال عرض کیا بستہ لب رہا

تیرے کرم نے مجھ کو عطا کی وہ بے خودی

عرض سپاس کا مجھے پھر ہوش کب رہا

تو نے جو کچھ دیا وہ دیا لطف خاص سے

پابند آستیں مرا دست طلب رہا

اس بزم میں نگاہ پہ قابو نہ رکھ سکا

ہاں مجھ کو اعتراف ہے میں بے ادب رہا

دور عمل میں ہم سے تو کچھ بھی نہ ہو سکا

اتنا ہوا کہ شہرۂ بزم ادب رہا

جام تہی ملا تری محفل سے کیا ہوا

پیمانہ دل کے خوں سے یہاں لب بہ لب رہا

فطرتؔ رموز عشق نہ کہہ گریہ کوش رہ

سب کچھ کہا اسی نے جو یاں بستہ لب رہا