mat dikhao hausle tufan guzar jaane ke baad

mat dikhāo hausle tūfāñ guzar jaane ke baa'd

mar gayā hai aadmī duniyā meñ Dar jaane ke baa'd

vaqt se tohfe meñ maiñ ne tajraba paayā nahīñ

zindagī ko jaan paayā huuñ bikhar jaane ke baa'd

dushmanoñ se jang meñ mumkin hai bach jaa.eñ magar

bach nahīñ sakte haiñ ham ummīd mar jaane ke baa'd

kaash aa jaa.e mujhe aañsū chhupāne kā hunar

dard ho jaatā hai zāhir aañkh bhar jaane ke baa'd

dhīre dhīre ban gayā ik ajnabī se āshnā

vo mire dil ke nasheman meñ Thahar jaane ke baa'd

aabrū ulfat vafā ḳhushiyāñ ta'alluq dostī

kuchh nahīñ bachtā hai nazroñ se utar jaane ke baa'd

mat dikhao hausle tufan guzar jaane ke ba'd

mar gaya hai aadmi duniya mein Dar jaane ke ba'd

waqt se tohfe mein main ne tajraba paya nahin

zindagi ko jaan paya hun bikhar jaane ke ba'd

dushmanon se jang mein mumkin hai bach jaen magar

bach nahin sakte hain hum ummid mar jaane ke ba'd

kash aa jae mujhe aansu chhupane ka hunar

dard ho jata hai zahir aankh bhar jaane ke ba'd

dhire dhire ban gaya ek ajnabi se aashna

wo mere dil ke nasheman mein Thahar jaane ke ba'd

aabru ulfat wafa KHushiyan ta'alluq dosti

kuchh nahin bachta hai nazron se utar jaane ke ba'd