mata-e-KHun-e-jigar ashk ko pila baiThe

matā-e-ḳhūn-e-jigar ashk ko pilā baiThe

asāsa haath meñ jitnā thā sab uThā baiThe

kisī hasīn se dil ko jo ham lagā baiThe

to apnī maut ko ḳhud aap hī bulā baiThe

baḌā gunāh kiyā jo qubūl kī dāvat

vo dil ko le uḌe aur duur jā baiThe

use bulāne baiThāne kā zikr hī kyā hai

jo az-ḳhud aa.e nigāhoñ meñ aur samā baiThe

hamāre haal pe itnā to vo karam kar de

ki dil na de na sahī kuchh qarīb aa baiThe

nafā samajh ke base the tumhāre kūche meñ

magar jo gāñTh meñ thā vo bhī sab luTā baiThe

ham un buzurg ke pairav haiñ ek adnā se

nazar kī raushnī jo tuur par gañvā baiThe

har ek bazm meñ charchā hai har zabāñ par zikr

ye kis se mājrā-e-ishq ham sunā baiThe

vo dast-e-faiz to 'rahbar' nihāl kar detā

umiid aap kisī aur se lagā baiThe

mata-e-KHun-e-jigar ashk ko pila baiThe

asasa hath mein jitna tha sab uTha baiThe

kisi hasin se dil ko jo hum laga baiThe

to apni maut ko KHud aap hi bula baiThe

baDa gunah kiya jo qubul ki dawat

wo dil ko le uDe aur dur ja baiThe

use bulane baiThane ka zikr hi kya hai

jo az-KHud aae nigahon mein aur sama baiThe

hamare haal pe itna to wo karam kar de

ki dil na de na sahi kuchh qarib aa baiThe

nafa samajh ke base the tumhaare kuche mein

magar jo ganTh mein tha wo bhi sab luTa baiThe

hum un buzurg ke pairaw hain ek adna se

nazar ki raushni jo tur par ganwa baiThe

har ek bazm mein charcha hai har zaban par zikr

ye kis se majra-e-ishq hum suna baiThe

wo dast-e-faiz to 'rahbar' nihaal kar deta

umid aap kisi aur se laga baiThe