mata-e-pas-e-wafa kho nahin sakunga main

matā-e-pās-e-vafā kho nahīñ sakūñgā maiñ

kisī kā tere sivā ho nahīñ sakūñgā maiñ

sadā rahegā tar-o-tāza shāḳh-e-dil par tū

fuzūl rañj ki kuchh bo nahīñ sakūñgā maiñ

tū āñhkeñ muuñd le to niiñd aa.e mujh ko bhī

tū jāntā hai ki yuuñ so nahīñ sakūñgā maiñ

mujhe virāsat-e-ġham se bhī aaq kar Daalā

ye kaisā lutf ki ab ro nahīñ sakūñgā maiñ

bahut hasīñ hai jahāñ, zindagī bhī ḳhuub magar

mazīd bār-e-nafas Dho nahīñ sakūñgā maiñ

mata-e-pas-e-wafa kho nahin sakunga main

kisi ka tere siwa ho nahin sakunga main

sada rahega tar-o-taza shaKH-e-dil par tu

fuzul ranj ki kuchh bo nahin sakunga main

tu aanhken mund le to nind aae mujh ko bhi

tu jaanta hai ki yun so nahin sakunga main

mujhe wirasat-e-gham se bhi aaq kar Dala

ye kaisa lutf ki ab ro nahin sakunga main

bahut hasin hai jahan, zindagi bhi KHub magar

mazid bar-e-nafas Dho nahin sakunga main