mata-e-shauq to hai dard-e-rozgar to hai

matā-e-shauq to hai dard-e-rozgār to hai

agar bahār nahīñ ishrat-e-bahār to hai

adā-e-chāk-e-garebāñ se bā-ḳhabar na sahī

junūn-e-shauq ko fardā kā e.atibār to hai

taras rahe haiñ dil-o-jāñ jo rañg-o-bū ke liye

mire nasīb meñ ik dasht-e-intizār to hai

kahāñ nasīb havas ko junūñ kī ārā.ish

lahū lahū hai garebān taar taar to hai

in ābloñ ko hiqārat se dekhne vaale

in ābloñ se chaman kā tire vaqār to hai

hazār tarah se rusvā haiñ ahl-e-dard to kyā

tirā dayār to hai terā rahguzār to hai

hayāt talḳh sahī roz-o-shab harām sahī

dil-o-nazar ko ye māhaul sāzgār to hai

mata-e-shauq to hai dard-e-rozgar to hai

agar bahaar nahin ishrat-e-bahaar to hai

ada-e-chaak-e-gareban se ba-KHabar na sahi

junun-e-shauq ko farda ka eatibar to hai

taras rahe hain dil-o-jaan jo rang-o-bu ke liye

mere nasib mein ek dasht-e-intizar to hai

kahan nasib hawas ko junun ki aaraish

lahu lahu hai gareban tar tar to hai

in aablon ko hiqarat se dekhne wale

in aablon se chaman ka tere waqar to hai

hazar tarah se ruswa hain ahl-e-dard to kya

tera dayar to hai tera rahguzar to hai

hayat talKH sahi roz-o-shab haram sahi

dil-o-nazar ko ye mahaul sazgar to hai