متین چہرہ نگہ درد آشنا نہ لگے

متین چہرہ نگہ درد آشنا نہ لگے

خدا کرے کہ تجھے میری بد دعا نہ لگے

کسی جراحت تازہ کا منتظر ہے دل

چلے خدنگ جفا دوستو نشانہ لگے

وہ شاہ ہو کے بھی شاہی وقار سے محروم

میں وہ گدا جو گدا ہو کے بھی گدا نہ لگے

جو ارتقا کے منازل ہیں جانتا ہوں میں

مجھے تو سنگ بھی انسان سے جدا نہ لگے

بتا سکو تو بتاؤ کہ حال کیا ہوگا

گدا کے ہاتھ کبھی گر کوئی خزانہ لگے

ولیؔ کو آپ ولیؔ کہتے ہیں ولیؔ ہوگا

مگر مجھے تو وہ کچھ ایسا پارسا نہ لگے