matlab na subh se na gharaz koi sham se

matlab na sub.h se na ġharaz koī shaam se

apnī to zindagī hai faqat daur-e-jām se

vāqif hai kaun ġhuncha-o-gul ke maqām se

sehn-e-chaman meñ phaile hue haiñ jo daam se

hotī nahīñ hai jin ko mayassar shab-e-nashāt

sub.h-e-bahār ke liye rote haiñ shaam se

duniyā samajh ga.ī hai ki hai ye fareb-e-zīst

Darne lage haiñ log mohabbat ke naam se

tār-e-nafas kī lai pe hai āvāz-e-zindagī

naġhme baraste rahte haiñ sāz-e-davām se

azm-e-samīm le ke nikaltā huuñ jab kabhī

manzil dikhā.ī detī hai do-chār gaam se

hotī chalī hai jab se tabī.at junūñ-navāz

rahne lagā huuñ duur ḳhirad ke maqām se

sāda-dilī nahīñ to ise aur kyā kaheñ

ham ġham uThā rahe haiñ masarrat ke naam se

'ḳhushtar' mileñge sab mire hālāt-e-zindagī

ḳhud aap jāñch lījiye mere kalām se

matlab na subh se na gharaz koi sham se

apni to zindagi hai faqat daur-e-jam se

waqif hai kaun ghuncha-o-gul ke maqam se

sehn-e-chaman mein phaile hue hain jo dam se

hoti nahin hai jin ko mayassar shab-e-nashat

subh-e-bahaar ke liye rote hain sham se

duniya samajh gai hai ki hai ye fareb-e-zist

Darne lage hain log mohabbat ke nam se

tar-e-nafas ki lai pe hai aawaz-e-zindagi

naghme baraste rahte hain saz-e-dawam se

azm-e-samim le ke nikalta hun jab kabhi

manzil dikhai deti hai do-chaar gam se

hoti chali hai jab se tabiat junun-nawaz

rahne laga hun dur KHirad ke maqam se

sada-dili nahin to ise aur kya kahen

hum gham uTha rahe hain masarrat ke nam se

'KHushtar' milenge sab mere haalat-e-zindagi

KHud aap jaanch lijiye mere kalam se