مطلب نہ صبح سے نہ غرض کوئی شام سے

مطلب نہ صبح سے نہ غرض کوئی شام سے

اپنی تو زندگی ہے فقط دور جام سے

واقف ہے کون غنچہ و گل کے مقام سے

صحن چمن میں پھیلے ہوئے ہیں جو دام سے

ہوتی نہیں ہے جن کو میسر شب نشاط

صبح بہار کے لئے روتے ہیں شام سے

دنیا سمجھ گئی ہے کہ ہے یہ فریب زیست

ڈرنے لگے ہیں لوگ محبت کے نام سے

تار نفس کی لے پہ ہے آواز زندگی

نغمے برستے رہتے ہیں ساز دوام سے

عزم صمیم لے کے نکلتا ہوں جب کبھی

منزل دکھائی دیتی ہے دو چار گام سے

ہوتی چلی ہے جب سے طبیعت جنوں نواز

رہنے لگا ہوں دور خرد کے مقام سے

سادہ دلی نہیں تو اسے اور کیا کہیں

ہم غم اٹھا رہے ہیں مسرت کے نام سے

خوشترؔ ملیں گے سب مرے حالات زندگی

خود آپ جانچ لیجئے میرے کلام سے