mauj-dar-mauj wo aawaz sunai degi

mauj-dar-mauj vo āvāz sunā.ī degī

kaan gauhar hī nahīñ saarī ḳhudā.ī degī

vo jasārat pe tirī āg-bagūlā hogī

kāñpte hāthoñ meñ phir dast-e-hinā.ī degī

ye zamīñ dekhne meñ sabz nazar aatī hai

do qadam aur chalo soḳhta-pā.ī degī

āḳhirash daar pe gardan meñ paḌegī rassī

ḳhud hī aa.egī tire haq meñ safā.ī degī

bahr-e-ahmar kī havā hai ise kyoñ rokte ho

nange ashjār ko malbūs tilā.ī degī

ye na samjho usī par ḳhatm hue us ke sitam

le ke bāñhoñ meñ tumheñ dāġh-e-judā.ī degī

tiira zindāñ meñ rahegā dam-e-āḳhir baaqī

aa.egī chāñdnī ke rath pe rihā.ī degī

ābida thī isī tārīk galī meñ Duubī

sub.h ho jaa.e sar-e-shāḳh dikhā.ī degī

mauj-dar-mauj wo aawaz sunai degi

kan gauhar hi nahin sari KHudai degi

wo jasarat pe teri aag-bagula hogi

kanpte hathon mein phir dast-e-hinai degi

ye zamin dekhne mein sabz nazar aati hai

do qadam aur chalo soKHta-pai degi

aaKHirash dar pe gardan mein paDegi rassi

KHud hi aaegi tere haq mein safai degi

bahr-e-ahmar ki hawa hai ise kyon rokte ho

nange ashjar ko malbus tilai degi

ye na samjho usi par KHatm hue us ke sitam

le ke banhon mein tumhein dagh-e-judai degi

tera zindan mein rahega dam-e-aKHir baqi

aaegi chandni ke rath pe rihai degi

aabida thi isi tarik gali mein Dubi

subh ho jae sar-e-shaKH dikhai degi