mauj-e-dariya pe chha raha hai ye kaun

mauj-e-dariyā pe chhā rahā hai ye kaun

sej par rasmasā rahā hai ye kaun

sub.h panghaT pe ho rahī hai tulūa

ruḳh se kākul haTā rahā hai ye kaun

adh-khulī añkhḌiyoñ ko mal mal kar

jū-e-pul meñ nahā rahā hai ye kaun

bojhal anfās ke talātum se

be-sadā jhanjhanā rahā hai ye kaun

aañch goyā havā meñ zer-o-zabar

niiñd meñ sansanā rahā hai ye kaun

sat.h-e-dariyā pe chāñdnī jaise

chauñk kar muskurā rahā hai ye kaun

karvaToñ ke girā.e takiyoñ ko

kasmasā kar uThā rahā hai ye kaun

rū-e-nā-shusta ke dhuñdalke meñ

ras kī būñdeñ girā rahā hai ye kaun

ek añgḌā.ī se do-ālam ko

rāgnī meñ jhulā rahā hai ye kaun

niiñd kī rau meñ sham.a ke mānind

sub.h ko jhilmilā rahā hai ye kaun

sharm se champa.ī kalā.ī meñ

sabz chauḌī ghumā rahā hai ye kaun

dair-e-sub.h-e-bahār kī zanjīr

rañg-e-ruḳh se hilā rahā hai ye kaun

añkhḌiyāñ jald jald jhapkā kar

surḳh Dore bajā rahā hai ye kaun

kardgārā mire dar-e-dil ko

sub.h-dam khaTkhaTā rahā hai ye kaun

teġh doshīzgī ke paanī se

aag dil meñ lagā rahā hai ye kaun

tah-ba-tah kar ke biich kī uñglī

band muTThī bajā rahā hai ye kaun

zer-e-dandāñ dabā ke surḳh añgusht

umr apnī batā rahā hai ye kaun

jo bahut duur jā chukā thā use

paas apne bulā rahā hai ye kaun

ahd-e-sheb-o-shabāb ke mābain

fāsloñ ko haTā rahā hai ye kaun

gul paḌā hai jo ek muddat se

us diye ko jalā rahā hai ye kaun

so chukī hai jo ik zamāne se

is ḳhalish ko jagā rahā hai ye kaun

merī sehat se bad-maza ho kar

rog dil ko lagā rahā hai ye kaun

ek muddat se jo mufakkir hai

us ko mutrib banā rahā hai ye kaun

mujh se maġhrūr-o-bad-dimāġh kā sar

apne dar par jhukā rahā hai ye kaun

korī āñkhoñ ke taaza ashkoñ se

ik nayā gul khilā rahā hai ye kaun

soz-e-pinhāñ meñ Dhaal kar mukhḌā

saaz mere hilā rahā hai ye kaun

aql ke qasr-e-be-niyāzī par

naaz ke ghan chalā rahā hai ye kaun

merī dānish-varī ke lohe ko

tāb-e-ruḳh se galā rahā hai ye kaun

mujh meñ ik guuna be-ruḳhī pā kar

ḳhud-kushī se Darā rahā hai ye kaun

'josh' mere khañDar ko az-sar-e-nau

rājdhānī banā rahā hai ye kaun

mauj-e-dariya pe chha raha hai ye kaun

sej par rasmasa raha hai ye kaun

subh panghaT pe ho rahi hai tulua

ruKH se kakul haTa raha hai ye kaun

adh-khuli ankhDiyon ko mal mal kar

ju-e-pul mein naha raha hai ye kaun

bojhal anfas ke talatum se

be-sada jhanjhana raha hai ye kaun

aanch goya hawa mein zer-o-zabar

nind mein sansana raha hai ye kaun

sath-e-dariya pe chandni jaise

chaunk kar muskura raha hai ye kaun

karwaTon ke girae takiyon ko

kasmasa kar uTha raha hai ye kaun

ru-e-na-shusta ke dhundalke mein

ras ki bunden gira raha hai ye kaun

ek angDai se do-alam ko

ragni mein jhula raha hai ye kaun

nind ki rau mein shama ke manind

subh ko jhilmila raha hai ye kaun

sharm se champai kalai mein

sabz chauDi ghuma raha hai ye kaun

dair-e-subh-e-bahaar ki zanjir

rang-e-ruKH se hila raha hai ye kaun

ankhDiyan jald jald jhapka kar

surKH Dore baja raha hai ye kaun

kardgara mere dar-e-dil ko

subh-dam khaTkhaTa raha hai ye kaun

tegh doshizgi ke pani se

aag dil mein laga raha hai ye kaun

tah-ba-tah kar ke bich ki ungli

band muTThi baja raha hai ye kaun

zer-e-dandan daba ke surKH angusht

umr apni bata raha hai ye kaun

jo bahut dur ja chuka tha use

pas apne bula raha hai ye kaun

ahd-e-sheb-o-shabab ke mabain

faslon ko haTa raha hai ye kaun

gul paDa hai jo ek muddat se

us diye ko jala raha hai ye kaun

so chuki hai jo ek zamane se

is KHalish ko jaga raha hai ye kaun

meri sehat se bad-maza ho kar

rog dil ko laga raha hai ye kaun

ek muddat se jo mufakkir hai

us ko mutrib bana raha hai ye kaun

mujh se maghrur-o-bad-dimagh ka sar

apne dar par jhuka raha hai ye kaun

kori aankhon ke taza ashkon se

ek naya gul khila raha hai ye kaun

soz-e-pinhan mein Dhaal kar mukhDa

saz mere hila raha hai ye kaun

aql ke qasr-e-be-niyazi par

naz ke ghan chala raha hai ye kaun

meri danish-wari ke lohe ko

tab-e-ruKH se gala raha hai ye kaun

mujh mein ek guna be-ruKHi pa kar

KHud-kushi se Dara raha hai ye kaun

'josh' mere khanDar ko az-sar-e-nau

rajdhani bana raha hai ye kaun