mauj-e-gul mauj-e-saba mauj-e-sahar lagti hai

mauj-e-gul mauj-e-sabā mauj-e-sahar lagtī hai

sar se pā tak vo samāñ hai ki nazar lagtī hai

ham ne har gaam pe sajdoñ ke jalā.e haiñ charāġh

ab hameñ terī galī rāhguzar lagtī hai

lamhe lamhe meñ basī hai tirī yādoñ kī mahak

aaj kī raat to ḳhushbū kā safar lagtī hai

jal gayā apnā nasheman to koī baat nahīñ

dekhnā ye hai ki ab aag kidhar lagtī hai

saarī duniyā meñ ġharīboñ kā lahū bahtā hai

har zamīñ mujh ko mire ḳhuun se tar lagtī hai

koī āsūda nahīñ ahl-e-siyāsat ke sivā

ye sadī dushman-e-arbāb-e-hunar lagtī hai

vāqi.a shahr meñ kal to koī aisā na huā

ye to aḳhbār ke daftar kī ḳhabar lagtī hai

lucknow kyā tirī galiyoñ kā muqaddar thā yahī

har galī aaj tirī ḳhāk-basar lagtī hai

mauj-e-gul mauj-e-saba mauj-e-sahar lagti hai

sar se pa tak wo saman hai ki nazar lagti hai

hum ne har gam pe sajdon ke jalae hain charagh

ab hamein teri gali rahguzar lagti hai

lamhe lamhe mein basi hai teri yaadon ki mahak

aaj ki raat to KHushbu ka safar lagti hai

jal gaya apna nasheman to koi baat nahin

dekhna ye hai ki ab aag kidhar lagti hai

sari duniya mein gharibon ka lahu bahta hai

har zamin mujh ko mere KHun se tar lagti hai

koi aasuda nahin ahl-e-siyasat ke siwa

ye sadi dushman-e-arbab-e-hunar lagti hai

waqia shahr mein kal to koi aisa na hua

ye to aKHbar ke daftar ki KHabar lagti hai

lucknow kya teri galiyon ka muqaddar tha yahi

har gali aaj teri KHak-basar lagti hai