mauj-e-KHayal mein na kisi jal-pari mein aae

mauj-e-ḳhayāl meñ na kisī jal-parī meñ aa.e

dariyā ke saare rañg mirī tishnagī meñ aa.e

phir ek roz aan milā abr-e-ham-mizāj

miTTī numū-e-pazīr huī tāzgī meñ aa.e

dāman bachā rahe the ki chehra bhī jal gayā

kis aag se guzar ke tirī raushnī meñ aa.e

ye maiñ huuñ mere ḳhvāb ye shamshīr-e-be-niyām

ab terā iḳhtiyār hai jo tere jī meñ aa.e

ik baar is jahān se mil lenā chāhiye

aisā na ho ki phir ye faqat ḳhvāb hī meñ aa.e

āñkhoñ meñ vo lapak hai na siine meñ vo alaav

is baar us se kahnā zarā sādgī meñ aa.e

tanhā udaas dekh rahā thā maiñ chāñd ko

ye phuul bahte bahte kahāñ se nadī meñ aa.e

thak-hār kar girā thā ki āñkhoñ meñ phir ga.e

'tauqīr' vo maqām jo āvārgī meñ aa.e

mauj-e-KHayal mein na kisi jal-pari mein aae

dariya ke sare rang meri tishnagi mein aae

phir ek roz aan mila abr-e-ham-mizaj

miTTi numu-e-pazir hui tazgi mein aae

daman bacha rahe the ki chehra bhi jal gaya

kis aag se guzar ke teri raushni mein aae

ye main hun mere KHwab ye shamshir-e-be-niyam

ab tera iKHtiyar hai jo tere ji mein aae

ek bar is jahan se mil lena chahiye

aisa na ho ki phir ye faqat KHwab hi mein aae

aankhon mein wo lapak hai na sine mein wo alaw

is bar us se kahna zara sadgi mein aae

tanha udas dekh raha tha main chand ko

ye phul bahte bahte kahan se nadi mein aae

thak-haar kar gira tha ki aankhon mein phir gae

'tauqir' wo maqam jo aawargi mein aae