mauj-e-shamim hain na KHiram-e-saba hain hum

mauj-e-shamīm haiñ na ḳhirām-e-sabā haiñ ham

Thahrī huī guloñ ke laboñ par duā haiñ ham

begāna ḳhalq se haiñ na tujh se ḳhafā haiñ ham

ai zindagī muaaf ki dair-āshnā haiñ ham

is raaz ko bhī faash kar ai chashm-e-dil-navāz

kāñTā khaTak rahā hai ye dil meñ ki kyā haiñ ham

yārab tirā kamāl-e-hunar ham pe ḳhatm hai

yā sirf mashq-e-nāz kā ik tajraba haiñ ham

āḳhir tire sulūk ne jhuTlā diyā ise

ik zo.am thā hamīñ ki sarāpā vafā haiñ ham

kal is zamīñ pe utreñge phūloñ ke qāfile

ik paikar-e-bahār kī āvāz-e-pā haiñ ham

mauj-e-shamim hain na KHiram-e-saba hain hum

Thahri hui gulon ke labon par dua hain hum

begana KHalq se hain na tujh se KHafa hain hum

ai zindagi muaf ki dair-ashna hain hum

is raaz ko bhi fash kar ai chashm-e-dil-nawaz

kanTa khaTak raha hai ye dil mein ki kya hain hum

yarab tera kamal-e-hunar hum pe KHatm hai

ya sirf mashq-e-naz ka ek tajraba hain hum

aaKHir tere suluk ne jhuTla diya ise

ek zoam tha hamin ki sarapa wafa hain hum

kal is zamin pe utrenge phulon ke qafile

ek paikar-e-bahaar ki aawaz-e-pa hain hum