mauj lahrae bhanwar ghume hawa gae ghazal

mauj lahrā.e bhañvar ghūme havā gaa.e ġhazal

har adā meñ ik nayā andāz dikhlā.e ġhazal

āriz-o-lab gesū-o-qad tak kahāñ mahdūd hai

zindagī kā ma.anī-o-matlab bhī samjhā.e ġhazal

tīra-o-tārīk rāhoñ meñ kabhī rakhe charāġh

aur kabhī rangīn āñchal ban ke lahrā.e ġhazal

zulf kī ThanDī mo'attar chhāñv meñ ban jaa.e ḳhvāb

chilchilātī dhuup meñ tap kar nikhar aa.e ġhazal

naġhmagī jharne kī ThanDak chāñdnī kī dil kā nuur

ek jaañ ho jaa.e jab guñdh kar to kahlā.e ġhazal

raat kī tanhā.iyoñ meñ jab udāsī gher le

ek aañsū ban ke chupke se Tapak jaa.e ġhazal

yaad ke be-rañg lamhe hoñT jab siine lageñ

rū-ba-rū 'zahrā' koī aa kar sunā jaa.e ġhazal

mauj lahrae bhanwar ghume hawa gae ghazal

har ada mein ek naya andaz dikhlae ghazal

aariz-o-lab gesu-o-qad tak kahan mahdud hai

zindagi ka mani-o-matlab bhi samjhae ghazal

tira-o-tarik rahon mein kabhi rakhe charagh

aur kabhi rangin aanchal ban ke lahrae ghazal

zulf ki ThanDi mo'attar chhanw mein ban jae KHwab

chilchilati dhup mein tap kar nikhar aae ghazal

naghmagi jharne ki ThanDak chandni ki dil ka nur

ek jaan ho jae jab gundh kar to kahlae ghazal

raat ki tanhaiyon mein jab udasi gher le

ek aansu ban ke chupke se Tapak jae ghazal

yaad ke be-rang lamhe honT jab sine lagen

ru-ba-ru 'zahra' koi aa kar suna jae ghazal