mauja-e-dard se jismon mein rawani de ja

mauja-e-dard se jismoñ meñ ravānī de jā

ḳhushk dariyāoñ nadī nāloñ ko paanī de jā

kuchh to samjhā de tilismāt-e-shab-o-roz mujhe

in hisāroñ meñ koī bāb-e-ma.ānī de jā

zulmat-e-habs dil-o-jāñ meñ jalā sham.a huā

tū kahīñ hai to mujhe apnī nishānī de jā

maiñ subuk-sair sahī mujh ko tū pur-ḳhas na banā

in havāoñ meñ mujhe thoḌī girānī de jā

nā-mukammal hai koī bāb-e-chaman jin ke baġhair

qissa-e-gul ke vo aurāq-e-ḳhizānī de jā

kab se be-āb haiñ ā.īne mirī āñkhoñ ke

un na.e chehroñ meñ kuchh shakleñ purānī de jā

aag barsāte hue din kī hadeñ bāñdh kabhī

garm shāmoñ meñ koī shaam suhānī de jā

har ghaḌī dil se gurezāñ haiñ umīdeñ 'shāhīñ'

in makīnoñ ko zarā shauq-e-makānī de jā

mauja-e-dard se jismon mein rawani de ja

KHushk dariyaon nadi nalon ko pani de ja

kuchh to samjha de tilismat-e-shab-o-roz mujhe

in hisaron mein koi bab-e-maani de ja

zulmat-e-habs dil-o-jaan mein jala shama hua

tu kahin hai to mujhe apni nishani de ja

main subuk-sair sahi mujh ko tu pur-KHas na bana

in hawaon mein mujhe thoDi girani de ja

na-mukammal hai koi bab-e-chaman jin ke baghair

qissa-e-gul ke wo auraq-e-KHizani de ja

kab se be-ab hain aaine meri aankhon ke

un nae chehron mein kuchh shaklen purani de ja

aag barsate hue din ki haden bandh kabhi

garm shamon mein koi sham suhani de ja

har ghaDi dil se gurezan hain umiden 'shahin'

in makinon ko zara shauq-e-makani de ja