mauja-e-reg-e-rawan-e-gham mein bah ke dekhna

mauja-e-reg-e-ravān-e-ġham meñ bah ke dekhnā

muflisī meñ dostoñ ke saath rah ke dekhnā

dāman-e-iz.hār meñ jazbe samā sakte haiñ nahīñ

baat phir bhī baat hai ik baar kah ke dekhnā

ḳhud ko miTTī kā gharauñdā farz hī karnā nahīñ

āñdhiyoñ kī zad meñ rahnā aur Dhah ke dekhnā

dil ke sannāTe meñ ḳhushbū ke darīche khul ga.e

dastakoñ ke phuul darvāze pe mahke dekhnā

kāsa-e-fitrat meñ phir ḳhvāhish ke sikke baj uThe

phir parinde saañs kī Daalī pe chahke dekhnā

be-asar hī kyuuñ na ho par apnī zaatī soch ho

dosto taḳhlīq-e-fan kā karb sah ke dekhnā

bādshāhat ke maze haiñ ḳhāksārī meñ 'salīm'

ye nazāra yaar ke kūche meñ rah ke dekhnā

mauja-e-reg-e-rawan-e-gham mein bah ke dekhna

muflisi mein doston ke sath rah ke dekhna

daman-e-izhaar mein jazbe sama sakte hain nahin

baat phir bhi baat hai ek bar kah ke dekhna

KHud ko miTTi ka gharaunda farz hi karna nahin

aandhiyon ki zad mein rahna aur Dhah ke dekhna

dil ke sannaTe mein KHushbu ke dariche khul gae

dastakon ke phul darwaze pe mahke dekhna

kasa-e-fitrat mein phir KHwahish ke sikke baj uThe

phir parinde sans ki Dali pe chahke dekhna

be-asar hi kyun na ho par apni zati soch ho

dosto taKHliq-e-fan ka karb sah ke dekhna

baadshahat ke maze hain KHaksari mein 'salim'

ye nazara yar ke kuche mein rah ke dekhna