maujon ka shor-o-shar hai barabar laga hua

maujoñ kā shor-o-shar hai barābar lagā huā

dariyā se is qadar hai mirā ghar lagā huā

aisā na ho ki TuuT paḌe sar pe āsmāñ

hai kuchh dinoñ se mujh ko baḌā Dar lagā huā

ab us ke shar se ḳhud ko bachānā bhī hai mujhe

rahtā hai mere saath jo aksar lagā huā

had chhū rahī thī raat jahāñ tishnagī mirī

thā us ke ba.ad ek samundar lagā huā

sannāTe chīḳhte haiñ mire chār-sū magar

dil meñ hai iztirāb kā mahshar lagā huā

dushman kī baat chhoḌiye hairat hai ḳhud mujhe

gardan se aaj bhī hai mirā sar lagā huā

taktā huuñ be-qarār nigāhoñ se baar baar

hai āsmāñ se merā kabūtar lagā huā

maujon ka shor-o-shar hai barabar laga hua

dariya se is qadar hai mera ghar laga hua

aisa na ho ki TuT paDe sar pe aasman

hai kuchh dinon se mujh ko baDa Dar laga hua

ab us ke shar se KHud ko bachana bhi hai mujhe

rahta hai mere sath jo aksar laga hua

had chhu rahi thi raat jahan tishnagi meri

tha us ke baad ek samundar laga hua

sannaTe chiKHte hain mere chaar-su magar

dil mein hai iztirab ka mahshar laga hua

dushman ki baat chhoDiye hairat hai KHud mujhe

gardan se aaj bhi hai mera sar laga hua

takta hun be-qarar nigahon se bar bar

hai aasman se mera kabutar laga hua