maujon ne uski mujhko kahin ka nahin rakha

maujoñ ne us kī mujh ko kahīñ kā nahīñ rakhā

dariyā-e-ishq ne to kinārā nahīñ rakhā

ruḳhsat kiyā gayā use us kī hī shart par

maiñ ne tamām umr kā jhagḌā nahīñ rakhā

apne sabhī aziiz bichhaḌte chale ga.e

lekin udaas maiñ ne bhī chehra nahīñ rakhā

masjid nazar na aa.e kisī ko bhī duur se

apne makāñ ko itnā bhī ūñchā nahīñ rakhā

aa.ī tumhārī yaad to kyā kuchh nahīñ kiyā

dil ko kisī bhī haal meñ tanhā nahīñ rakhā

ḳhāk-e-vatan ko ḳhuun se ham sīñchte rahe

aañsū bhī kar ke aañkh meñ yakjā nahīñ rakhā

us kā bhī vāpsī kā irāda na thā koī

maiñ ne bhī lauT aane kā rasta nahīñ rakhā

maujon ne us ki mujh ko kahin ka nahin rakha

dariya-e-ishq ne to kinara nahin rakha

ruKHsat kiya gaya use us ki hi shart par

main ne tamam umr ka jhagDa nahin rakha

apne sabhi aziz bichhaDte chale gae

lekin udas main ne bhi chehra nahin rakha

masjid nazar na aae kisi ko bhi dur se

apne makan ko itna bhi uncha nahin rakha

aai tumhaari yaad to kya kuchh nahin kiya

dil ko kisi bhi haal mein tanha nahin rakha

KHak-e-watan ko KHun se hum sinchte rahe

aansu bhi kar ke aankh mein yakja nahin rakha

us ka bhi wapsi ka irada na tha koi

main ne bhi lauT aane ka rasta nahin rakha