maujud kuchh nahin yahan madum kuchh nahin

maujūd kuchh nahīñ yahāñ ma.adūm kuchh nahīñ

ye ziist hai to ziist kā mafhūm kuchh nahīñ

manzar hijāb aur hī kuchh manzaroñ ke haiñ

ma.alūm ham ko ye hai ki ma.alūm kuchh nahīñ

ḳhvāb-o-ḳhayāl samjheñ to maujūd hai jahāñ

kuchh bhī sivā.e nuqta-e-mauhūm kuchh nahīñ

harf-o-bayāñ nazāre sitāre dil-o-nazar

har shai meñ intishār hai manzūm kuchh nahīñ

jo mil gayā hai, jis kī hameñ aarzū rahī

aur jis se ḳhud ko rakkhā hai mahrūm kuchh nahīñ

jis ke baġhair jī nahīñ sakte the jiite haiñ

pas tai huā ki lāzim-o-malzūm kuchh nahīñ

maujud kuchh nahin yahan madum kuchh nahin

ye zist hai to zist ka mafhum kuchh nahin

manzar hijab aur hi kuchh manzaron ke hain

malum hum ko ye hai ki malum kuchh nahin

KHwab-o-KHayal samjhen to maujud hai jahan

kuchh bhi siwae nuqta-e-mauhum kuchh nahin

harf-o-bayan nazare sitare dil-o-nazar

har shai mein intishaar hai manzum kuchh nahin

jo mil gaya hai, jis ki hamein aarzu rahi

aur jis se KHud ko rakkha hai mahrum kuchh nahin

jis ke baghair ji nahin sakte the jite hain

pas tai hua ki lazim-o-malzum kuchh nahin