mausam aane pe shajar baur se bhar jata hai

mausam aane pe shajar baur se bhar jaatā hai

jaane kis or magar saarā samar jaatā hai

aa ke baiThe ho tum aur vaqt-e-sahar aa pahuñchā

kis qadar jald bhalā vaqt guzar jaatā hai

jab bhī beTī kī judā.ī kā samāñ sochtā huuñ

ek ḳhanjar mire siine meñ utar jaatā hai

tū ne dekhā hī nahīñ muḌ ke zarā ai ḳhūbāñ

koī kūche se tire ḳhāk-ba-sar jaatā hai

ġham na kar tū jo taḌaptā huuñ maiñ gaahe gaahe

jaate jaate hī mohabbat kā asar jaatā hai

kaisī tāsīr hai is husn-e-fusūñ-sāz kī bhī

koī jiitā hai koī dekh ke mar jaatā hai

ik zarūrat ne jhukāyā mujhe kis kis dar par

mire andar ye koī soch ke mar jaatā hai

kaisī mushkil meñ mujhe Daal diyā ai daurāñ

maiñ ki dastār bachātā huuñ to sar jaatā hai

mausam aane pe shajar baur se bhar jata hai

jaane kis or magar sara samar jata hai

aa ke baiThe ho tum aur waqt-e-sahar aa pahuncha

kis qadar jald bhala waqt guzar jata hai

jab bhi beTi ki judai ka saman sochta hun

ek KHanjar mere sine mein utar jata hai

tu ne dekha hi nahin muD ke zara ai KHuban

koi kuche se tere KHak-ba-sar jata hai

gham na kar tu jo taDapta hun main gahe gahe

jate jate hi mohabbat ka asar jata hai

kaisi tasir hai is husn-e-fusun-saz ki bhi

koi jita hai koi dekh ke mar jata hai

ek zarurat ne jhukaya mujhe kis kis dar par

mere andar ye koi soch ke mar jata hai

kaisi mushkil mein mujhe Dal diya ai dauran

main ki dastar bachata hun to sar jata hai