mausam-e-gul aa gaya saghar uTha

mausam-e-gul aa gayā sāġhar uThā

sāqiyā ab zindagī ke giit gā

ab na rah rah kar sitamgar yaad aa

yuuñ na fitna-gar mujhe paiham satā

ai ajal ab kyā hai tujh ko intizār

mujh ko terī justujū hai ḳhuub aa

de rahe haiñ is qadar dhoke nadīm

uTh ga.ī ho jaise duniyā se vafā

ittifāqan lab pe shikve aa ga.e

ye nahīñ thā varna merā mudda.ā

ab hameñ dair-o-haram se kyā ġharaz

ishq dil meñ bas gayā hai aap kā

mujh pe phir farmā.eñge vo mashq-e-nāz

phir mirā soyā muqaddar jaag uThā

yaad meñ barsoñ kisī kī ai 'naresh'

maiñ lahū shām-o-sahar rotā rahā

mausam-e-gul aa gaya saghar uTha

saqiya ab zindagi ke git ga

ab na rah rah kar sitamgar yaad aa

yun na fitna-gar mujhe paiham sata

ai ajal ab kya hai tujh ko intizar

mujh ko teri justuju hai KHub aa

de rahe hain is qadar dhoke nadim

uTh gai ho jaise duniya se wafa

ittifaqan lab pe shikwe aa gae

ye nahin tha warna mera muddaa

ab hamein dair-o-haram se kya gharaz

ishq dil mein bas gaya hai aap ka

mujh pe phir farmaenge wo mashq-e-naz

phir mera soya muqaddar jag uTha

yaad mein barson kisi ki ai 'naresh'

main lahu sham-o-sahar rota raha