mausam-e-gul mein koi kab hosh-mandana chala

mausam-e-gul meñ koī kab hosh-mandāna chalā

phuul dekhe jis ne kāñToñ meñ vo dīvāna chalā

ek hī manzil pe har raahī ko jaanā thā magar

zo.am-e-bātil meñ chalā jo bhī judāgāna chalā

us ke har ik gaam par thī kāmrānī saath saath

kārgāh-e-dahr meñ jo sarfaroshāna chalā

vā.izān-e-kam-nazar haiñ dushman-e-tamkīn-e-hosh

miT gayā vo in kī bātoñ par jo dīvāna chalā

mai-kade meñ ranj-o-ġham kaisā kahāñ kī mushkileñ

har ḳhalish jaatī rahī jab daur-e-paimāna chalā

āfrīñ sad āfrīñ ye himmat-e-zauq-e-talab

sham.a ke jalte hī jal marne ko parvāna chalā

koī asrār-e-mashiyyat ho na paayā āshkār

be-ḳhabar aayā thā 'kashfī' aur begāna chalā

mausam-e-gul mein koi kab hosh-mandana chala

phul dekhe jis ne kanTon mein wo diwana chala

ek hi manzil pe har rahi ko jaana tha magar

zoam-e-baatil mein chala jo bhi judagana chala

us ke har ek gam par thi kaamrani sath sath

kargah-e-dahr mein jo sarfaroshana chala

waizan-e-kam-nazar hain dushman-e-tamkin-e-hosh

miT gaya wo in ki baaton par jo diwana chala

mai-kade mein ranj-o-gham kaisa kahan ki mushkilen

har KHalish jati rahi jab daur-e-paimana chala

aafrin sad aafrin ye himmat-e-zauq-e-talab

shama ke jalte hi jal marne ko parwana chala

koi asrar-e-mashiyyat ho na paya aashkar

be-KHabar aaya tha 'kashfi' aur begana chala