mausam-e-gul mein yahi rae hai diwanon ki

mausam-e-gul meñ yahī raa.e hai dīvānoñ kī

dhajjiyāñ ab hoñ lagātār garebānoñ kī

miT ga.ī sham' kī tanvīr vo sab raat ke saath

ḳhaak bhī ab nazar aatī nahīñ parvānoñ kī

vahī vahshat vahī saudā vahī andāz-e-junūñ

shakl badlī nahīñ ab tak tire dīvānoñ kī

phuul ke badle chaḌhā jaate haiñ ahl-e-vahshat

dhajjiyāñ turbat-e-majnūñ pe garebānoñ kī

beḌiyāñ Daal ke zindāñ meñ na rakkheñ ahbāb

ḳhaak uḌānī hai abhī mujh ko bayābānoñ kī

gul-e-sad-barg ko vo dekh ke farmāte haiñ

ḳhaas pahchān hai ye chaak garebānoñ kī

maiñ sanam-ḳhāne ko masjid se chalā jab 'bismil'

uñgliyāñ uThne lagīñ mujh pe musalmānoñ kī

mausam-e-gul mein yahi rae hai diwanon ki

dhajjiyan ab hon lagatar garebanon ki

miT gai sham' ki tanwir wo sab raat ke sath

KHak bhi ab nazar aati nahin parwanon ki

wahi wahshat wahi sauda wahi andaz-e-junun

shakl badli nahin ab tak tere diwanon ki

phul ke badle chaDha jate hain ahl-e-wahshat

dhajjiyan turbat-e-majnun pe garebanon ki

beDiyan Dal ke zindan mein na rakkhen ahbab

KHak uDani hai abhi mujh ko bayabanon ki

gul-e-sad-barg ko wo dekh ke farmate hain

KHas pahchan hai ye chaak garebanon ki

main sanam-KHane ko masjid se chala jab 'bismil'

ungliyan uThne lagin mujh pe musalmanon ki