mausam-e-gul sath le kar barq o dam aa hi gaya

mausam-e-gul saath le kar barq o daam aa hī gayā

yaanī ab ḳhatre meñ gulshan kā nizām aa hī gayā

vo nigāh-e-mast uThī gardish meñ jaam aa hī gayā

yaanī vaqt-e-imtiyāz-e-ḳhās-o-ām aa hī gayā

jo uThā karte the iz.hār-e-taqaddus ke liye

un larazte kāñpte hāthoñ meñ jaam aa hī gayā

nuur o zulmat par tabassum kufr o diiñ par qahqahe

zindagī ko nashsha-e-umr-e-davām aa hī gayā

pāsbāñ karte rahe sargoshiyāñ hī aur kuchh

un kī mahfil se ba-izz-o-ehtarām aa hī gayā

jaane kin nazroñ se dekhā aaj saaqī ne mujhe

maiñ to ye samjhā ki mujh tak daur-e-jām aa hī gayā

ab isī ko zindagī kah lījiye yā sub.h-e-marg

aañkh kholī thī ki sar par vaqt-e-shām aa hī gayā

tark-e-mai ko muddateñ guzrī haiñ lekin mohtasib

sāqi-e-mehvash agar ātish-ba-jām aa hī gayā

haa.e ye aalam ki ab tark-e-vafā ke baad bhī

dil meñ huuk uTThī na uTThī lab pe naam aa hī gayā

lazzat-e-rañgīni-e-ash.ār kyā kahiye 'shakīl'

kuchh na kuchh ahbāb ko lutf-e-kalām aa hī gayā

mausam-e-gul sath le kar barq o dam aa hi gaya

yani ab KHatre mein gulshan ka nizam aa hi gaya

wo nigah-e-mast uThi gardish mein jam aa hi gaya

yani waqt-e-imtiyaz-e-KHas-o-am aa hi gaya

jo uTha karte the izhaar-e-taqaddus ke liye

un larazte kanpte hathon mein jam aa hi gaya

nur o zulmat par tabassum kufr o din par qahqahe

zindagi ko nashsha-e-umr-e-dawam aa hi gaya

pasban karte rahe sargoshiyan hi aur kuchh

un ki mahfil se ba-izz-o-ehtaram aa hi gaya

jaane kin nazron se dekha aaj saqi ne mujhe

main to ye samjha ki mujh tak daur-e-jam aa hi gaya

ab isi ko zindagi kah lijiye ya subh-e-marg

aankh kholi thi ki sar par waqt-e-sham aa hi gaya

tark-e-mai ko muddaten guzri hain lekin mohtasib

saqi-e-mehwash agar aatish-ba-jam aa hi gaya

hae ye aalam ki ab tark-e-wafa ke baad bhi

dil mein huk uTThi na uTThi lab pe nam aa hi gaya

lazzat-e-rangini-e-ashaar kya kahiye 'shakil'

kuchh na kuchh ahbab ko lutf-e-kalam aa hi gaya