mausam-e-gul tere inam abhi baqi hain

mausam-e-gul tire in.aam abhī baaqī haiñ

shahr meñ aur gul-andām abhī baaqī haiñ

aur khil jā ki ma.ārif kī guzargāhoñ meñ

pech ai zulf-e-siyah-fām abhī baaqī haiñ

ik subū aur ki lauh-e-dil-e-mai-noshāñ par

kuchh nuqūsh-e-sahar-o-shām abhī baaqī haiñ

Thahar ai bād-e-sahar is gul-e-nau-rasta ke naam

aur bhī shauq ke paiġhām abhī baaqī haiñ

uTTho ai shab ke ġhazālo ki sahar se pahle

chand lamhāt-e-ḳhush-anjām abhī baaqī haiñ

intizār ai dil-o-dīda ki hazāroñ asrār

saa.e kī tarah tah-e-jām abhī baaqī haiñ

khol kar kījiye tashrīh-e-sar-e-misra-e-zulf

is navishte meñ kuchh ib.hām abhī baaqī haiñ

ai sahī-qad tirī nisbat se sab ūñchī qadreñ

bāvajūd-e-ravish-e-ām abhī baaqī haiñ

ham meñ kal ke na sahī 'hāfiz'-o-'ḳhayyām' 'zafar'

aaj ke 'hāfiz'-o-'ḳhayyām' abhī baaqī haiñ

mausam-e-gul tere inam abhi baqi hain

shahr mein aur gul-andam abhi baqi hain

aur khil ja ki maarif ki guzargahon mein

pech ai zulf-e-siyah-fam abhi baqi hain

ek subu aur ki lauh-e-dil-e-mai-noshan par

kuchh nuqush-e-sahar-o-sham abhi baqi hain

Thahar ai baad-e-sahar is gul-e-nau-rasta ke nam

aur bhi shauq ke paigham abhi baqi hain

uTTho ai shab ke ghazalo ki sahar se pahle

chand lamhat-e-KHush-anjam abhi baqi hain

intizar ai dil-o-dida ki hazaron asrar

sae ki tarah tah-e-jam abhi baqi hain

khol kar kijiye tashrih-e-sar-e-misra-e-zulf

is nawishte mein kuchh ibham abhi baqi hain

ai sahi-qad teri nisbat se sab unchi qadren

bawajud-e-rawish-e-am abhi baqi hain

hum mein kal ke na sahi 'hafiz'-o-'KHayyam' 'zafar'

aaj ke 'hafiz'-o-'KHayyam' abhi baqi hain