mausam hai sazgar ghazal kah rahe hain hum

mausam hai sāzgār ġhazal kah rahe haiñ ham

dil par hai iḳhtiyār ġhazal kah rahe haiñ ham

zauq-e-junūñ ma.āl-e-ḳhirad kuchh na pūchhiye

dāman hai taar taar ġhazal kah rahe haiñ ham

apnī ġhazal hai shāhid-e-ma.anī bahār kī

parvarda-e-bahār ġhazal kah rahe haiñ ham

kahte haiñ chashm-e-nam se ġhazal meñ hai zindagī

shāyad hī dil-figār ġhazal kah rahe haiñ ham

gulshan meñ ab bhī dāman-e-lāla hai daaġh daaġh

hai zindagī se pyaar ġhazal kah rahe haiñ ham

vaise hai nazm-e-ā.ina-e-nazm-e-gulsitāñ

par ho ke be-qarār ġhazal keh rahe haiñ ham

chhiḌtī hai jab bhī un kī nigāh-e-karam kī baat

lagtā hai baar baar ġhazal kah rahe haiñ ham

bazm-e-adab maqām-e-ġhazal kaun jāniye

motī sī āb-dār ġhazal keh rahe haiñ ham

bazm-e-hayāt anjuman-e-dil nahīñ rahī

'tahsīn' hai intishār ġhazal keh rahe haiñ ham

mausam hai sazgar ghazal kah rahe hain hum

dil par hai iKHtiyar ghazal kah rahe hain hum

zauq-e-junun maal-e-KHirad kuchh na puchhiye

daman hai tar tar ghazal kah rahe hain hum

apni ghazal hai shahid-e-mani bahaar ki

parwarda-e-bahaar ghazal kah rahe hain hum

kahte hain chashm-e-nam se ghazal mein hai zindagi

shayad hi dil-figar ghazal kah rahe hain hum

gulshan mein ab bhi daman-e-lala hai dagh dagh

hai zindagi se pyar ghazal kah rahe hain hum

waise hai nazm-e-aina-e-nazm-e-gulsitan

par ho ke be-qarar ghazal keh rahe hain hum

chhiDti hai jab bhi un ki nigah-e-karam ki baat

lagta hai bar bar ghazal kah rahe hain hum

bazm-e-adab maqam-e-ghazal kaun jaaniye

moti si aab-dar ghazal keh rahe hain hum

bazm-e-hayat anjuman-e-dil nahin rahi

'tahsin' hai intishaar ghazal keh rahe hain hum