mausam udasiyon ke guzar hi nahin rahe

mausam udāsiyoñ ke guzar hī nahīñ rahe

aur ham bhī saḳht-jān haiñ mar hī nahīñ rahe

jis se kisī bhalā.ī kī ummīd rakh sakeñ

ham aisā koī kaam to kar hī nahīñ rahe

chehre pe chhā ga.ī hai kuchh aisī be-raunaqī

koshish ke bāvajūd sañvar hī nahīñ rahe

hairat hai ye ki aañkh se girne ke bāvajūd

kuchh log mere dil se utar hī nahīñ rahe

bārish thamī charāġh bujhā raat Dhal ga.ī

ham ek dūsre se to bhar hī nahīñ rahe

lab par sajī hañsī meñ magan haiñ sabhī 'asar'

logoñ meñ ab vo qalb-o-nazar hī nahīñ rahe

mausam udasiyon ke guzar hi nahin rahe

aur hum bhi saKHt-jaan hain mar hi nahin rahe

jis se kisi bhalai ki ummid rakh saken

hum aisa koi kaam to kar hi nahin rahe

chehre pe chha gai hai kuchh aisi be-raunaqi

koshish ke bawajud sanwar hi nahin rahe

hairat hai ye ki aankh se girne ke bawajud

kuchh log mere dil se utar hi nahin rahe

barish thami charagh bujha raat Dhal gai

hum ek dusre se to bhar hi nahin rahe

lab par saji hansi mein magan hain sabhi 'asar'

logon mein ab wo qalb-o-nazar hi nahin rahe