موسم اداسیوں کے گزر ہی نہیں رہے

موسم اداسیوں کے گزر ہی نہیں رہے

اور ہم بھی سخت جان ہیں مر ہی نہیں رہے

جس سے کسی بھلائی کی امید رکھ سکیں

ہم ایسا کوئی کام تو کر ہی نہیں رہے

چہرے پہ چھا گئی ہے کچھ ایسی بے رونقی

کوشش کے باوجود سنور ہی نہیں رہے

حیرت ہے یہ کہ آنکھ سے گرنے کے باوجود

کچھ لوگ میرے دل سے اتر ہی نہیں رہے

بارش تھمی چراغ بجھا رات ڈھل گئی

ہم ایک دوسرے سے تو بھر ہی نہیں رہے

لب پر سجی ہنسی میں مگن ہیں سبھی اثرؔ

لوگوں میں اب وہ قلب و نظر ہی نہیں رہے