mausamon ke taghayyur ko bhanpa nahin chhatriyan khol din

mausamoñ ke taġhayyur ko bhāñpā nahīñ chhatriyāñ khol diiñ

zaḳhm bharne se pahle kisī ne mirī paTTiyāñ khol diiñ

ham machheroñ se pūchho samundar nahīñ hai ye ifrīt hai

tum ne kyā soch kar sāhiloñ se bañdhī kashtiyāñ khol diiñ

us ne va.adoñ ke parbat se laTke ho.uuñ ko sahārā diyā

us kī āvāz par koh-paimāon ne rassiyāñ khol diiñ

dasht-e-ġhurbat meñ maiñ aur mirā yār-e-shab-zād bāham mile

yaar ke paas jo kuchh bhī thā yaar ne gaThḌiyāñ khol diiñ

kuchh baras to tirī yaad kī rail dil se guzartī rahī

aur phir maiñ ne thak haar ke ek din paTriyāñ khol diiñ

us ne sahrāoñ kī sair karte hue ik shajar ke tale

apnī āñkhoñ se ainak utārī ki do hirniyāñ khol diiñ

aaj ham kar chuke ahd-e-tark-e-suḳhan par raqam dastaḳhat

aaj ham ne na.e shā.iroñ ke liye bhartiyāñ khol deñ

mausamon ke taghayyur ko bhanpa nahin chhatriyan khol din

zaKHm bharne se pahle kisi ne meri paTTiyan khol din

hum machheron se puchho samundar nahin hai ye ifrit hai

tum ne kya soch kar sahilon se bandhi kashtiyan khol din

us ne wadon ke parbat se laTke houn ko sahaara diya

us ki aawaz par koh-paimaon ne rassiyan khol din

dasht-e-ghurbat mein main aur mera yar-e-shab-zad baham mile

yar ke pas jo kuchh bhi tha yar ne gaThDiyan khol din

kuchh baras to teri yaad ki rail dil se guzarti rahi

aur phir main ne thak haar ke ek din paTriyan khol din

us ne sahraon ki sair karte hue ek shajar ke tale

apni aankhon se ainak utari ki do hirniyan khol din

aaj hum kar chuke ahd-e-tark-e-suKHan par raqam dastaKHat

aaj hum ne nae shairon ke liye bhartiyan khol den